ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានអំពាវនាវឱ្យបងប្អូនឥស្លាមពង្រឹងសមត្ថភាពរបស់ ដែលអាចធ្វើជាមន្រ្តីនៅទីតាំងដែលមានបងប្អូនឥស្លាមច្រើន យ៉ាងហោចណាស់ត្រូវមានអភិបាលរងម្នាក់ ឬអភិបាលស្រុក។
ថ្លែងនៅក្នុងពិធិបិទសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងមហាផ្ទៃ នាថ្ងៃទី២៣ ខែកុម្ភៈ ឆ្នាំ២០២២ សម្តេចបានលើកឡើងថា៖ «ឧទាហរណ៍មានបញ្ហារកើតឡើងនៅតំបន់ដែលមានឥស្លាមរស់នៅច្រើន ចឹងមានតែមន្ត្រីជា ឥស្លាមនោះហើយដែលងាយដោះស្រាយ…. ប៉ុន្តែគាត់ត្រូវតែមានលក្ខណៈគ្រប់គ្រាន់ដើម្បីបំពេញការងារ»។
សម្តេចបានលើកឡើងថា មានវិសោធនកម្មច្បាប់ដើម្បីបង្កើនចំនួនកៅអីសម្រាប់គណៈអភិបាលខេត្ត ក្រុង ស្រុក ខណ្ឌ ដែលផ្តល់ឱកាសឱ្យបងប្អូនខ្មែរឥស្លាមធ្វើការជាមន្ត្រីងាយស្រួលធ្វើទំនាក់ទំនងក្នុងសហគមន៍។
សម្តេចបញ្ជាក់ថា នេះមិនមែនជាកូតានោះទេ តែនេះជាគោលនយោបាយ ហើយអំពាវនាវឱ្យបងប្អូនឥស្លាមពង្រឹងសមត្ថភាព មិនមែនតំណែងចេះតែដាក់ទេ៕